Një grindje që ka nisur midis fëmijëve, ka përfunduar me dy viktima në fshatin Kurjan të Roskovecit. Dy vëllezërit, Gramoz dhe Vladimir Kurtaj, 52 vjeç dhe 46 vjeç, kanë mbetur viktima të një grindjeje që ka nisur ditën e djeshme midis fëmijëve të tyre dhe djalit të 49-vjecarit Altin Kuka. Ndërsa kanë qenë në qendër të fshatit, në një lokal në pronësi të Gramoz Kurtajt, ka mbërritur për t’u sqaruar bashkëfshatari i tyre Altin Kuka. Sipas dëshmive në vendngjarje, sherri ka degjeneruar në sharje dhe përleshje fizike midis dy vëllezërve dhe autorit, I cili nuk ka qene i vetëm. Në gjaknxehtësi e sipër 49-vjeçar ka marrë një armë zjarri automatike dhe ka qëlluar drejt dy vëllezërve, njëri prej të cilëve ka ndërruar jetë në vend, ndërsa tjetri në spitalin rajonal të Fierit. Menjëherë pas ngjarjes, autori është vetëdorëzuar në komisariatin e policisë Fier, ku ka dorëzuar dhe armën e krimit. Ndërkohë, në fshatin Kurjan mbërritën dhjetëra forca policie për të arrestuar edhe bashkëpunëtorët e mundshëm të autorit dhe për të shmangur një konflikt të mundshëm midis dy fiseve. Për banorët e fshatit, kjo është një ngjarje ku shkaku nuk justifikon veprimin, ndaj dhe janë të tronditur, pasi ngjarje të tilla nuk kanë ndodhur kurrë në këtë fshat. Kjo është ngjarja e dytë e rëndë brenda pak ditëve në Roskovec. Dy ditë më parë, në një lokal në hyrje të qytetit, një i mitur 15-vjeçar plagosi rëndë me thikë një 39-vjeçar për shkaqe banale.