Një shtetas i Kosovës është në kërkim nga Policia e Serbisë për vrasjen e një zyrtari policor orët e para të së enjtes në kufirin serbo-boshnjak në Loznicë. Sipas Ministrisë së Punëve të Brendshme të shtetit serb, bëhet fjalë për Artan Hajrizin, dokumentet e të cilit u gjetën në vendin e ngjarjes. Ministri i brendshëm serb, Ivica Daçiq tha se dy policët serbë në pikën e kontrollit në Lipniçki Shor po kryenin kontrolle dhe kanë ndaluar një veturë të tipit Mercedes me targa të Tutinit të Serbisë, në të cilën ndodheshin dy persona. Sipas MPB-së serbe, njëri prej personave ka shtënë në drejtim të zyrtarit policor Nikolla Kërsmanoviq në gjoks, dhe zyrtarit policor Iliq Vjekosllav në shpatull e më pas ka ikur. Njëri nga të dyshuarit është arrestuar nga autoritetet serbe por identiteti i tij nuk është bërë i ditur. I dyshuari kryesor, Artan Hajrizi, për kapjen e të cilit janë aktivizuar edhe xhandarmëria serbe është vëllai i Faton Hajrizit, i cili është i dënuar për vrasje dhe vepra të tjera penale e që më gjashtë korrik të këtij viti u arratis nga burgu i Smrekonicës në Mitrovicë. Megjithatë, Artan Hajrizi tha se ndodhet në Gjermani dhe se dokumentet ia vodhi i vëllai, Fatoni. Për ngjarjen nga Ministria e Punëve të Jashtme të Kosovës thonë se "përmes Zyrës Ndërlidhëse në Beograd po ndjek nga afër zhvillimet në lidhje me pretendimet e Ministrit të Brendshëm të Serbisë, Ivica Daçiq" duke u bërë thirrje po ashtu që mërgimtarët dhe qytetarët e Kosovës të kenë kujdes gjatë lëvizjes nëpër Serbi. E kryeministri i Kosovës, Albin Kurti ka thënë se me çështjen po merren autoritetet dhe shton se kjo ngjarje nuk duhet të politizohet.