Prokuroria e Tiranës ka kërkuar 25 vite burg për ish-policin Tomor Çela, i cili në vitin 1997 vrau Elton Danin e Ledian Hoxhën pas një debati për një aksident me makinë. Çela ka punuar si punonjës policie në Komisariatin e Policisë Numër 4 Tiranë, detyrë nga e cila është liruar më datë 15.06.1997. Gjatë kohës që ka qenë në detyrë ai ka qenë i pajisur me armën automatik model Kallashnikov të cilin nuk e ka dorëzuar, por e ka mbajtur në banesë pa leje të organeve kompetente. Më 27 nëntor të atij viti, rreth orës 20:30 në lagjen nr.9, rruga Bajram Curri ka qëlluar me armë zjarri automatike ndaj viktimave Elton Danin dhe Ledian Hoxhën, duke ju shkaktuar vdekjen e menjëhershme. Viktimat në momentin e vrasjes kanë qenë duke udhëtuar me një mjet tip Volvo. Pas kryerjes së vrasjes Çela është larguar menjëherë nga vendi i ngjarjes. Gjatë hetimit të këtij procedimi penal nuk është përcaktuar qartë shkaku i ndodhjes së kësaj ngjarje të rëndë me pasojë vrasjen e dy personave. Tre katër ditë përpara ngjarjes, ish-polici ishte duke drejtuar një automjet tip Mercedes benz 240 është përplasur me autoveturën ku udhëtonin dy personat, ku për pasojë janë dëmtuar të dy mjetet. Pas aksidentit i pandehuri është konfliktuar me të dy, dhe më pas duke mos u dakordësuar në lidhje me dëmet e shkaktuara kanë lindur kontradikta të cilat kanë çuar në ndodhjen e kësaj ngjarjeje të rëndë me pasojë vrasjen e tyre, thotë Prokuroria. “Nga aktet e administruara në dosje rezulton se i pandehuri i është shmangur hetimit dhe gjykimit të çështjes në ngarkim të tij. Nga ana e të pandehurit nuk është paraqitur asnjë shenjë pendese për vrasjen e dy shtetasve. Duke patur parasysh rrethanat e çështjes dhe sanksionin që parashikon ligji për këtë vepër penale, Prokuroria pranë Gjykatës së Shkallës së Parë e Juridiksionit të Përgjithshëm, Tiranë kërkon deklarimin fajtor të të pandehurit, T.Ç. për veprën penale ‘Vrasje me paramendim’ në dëm të shtetasit E.D. dhe L.H. dhe dënimin e tij me 25 vite burg”-sipas prokurorisë.