Drejtoria e Përgjithshme e Burgjeve ka transferuar sot nga burgu i Peqinit në atë të Burrelit, pasi në qeli iu gjet lëndë narkotike e fshehur në çorape. Ai është Miklovan Parubi, i dënuar për vrasjen e dy personave dhe plagosjen e katër të tjerëve në Shkodër në 2016 Ngjarja e rëndë ndodhi pasi një lojë pokeri mes shokësh, degjeneroi në masakër në Dajç të Shkodrës. Viktimat ishin Arjet Saiti, 42 vjeç dhe Gacalin Kopshti, 30 vjeç, ndërsa të plagosur mbetën Aleks Prendi, Ndok Marku, Vinçens Kopshti dhe Kitas Molla. Autori, në atë kohë 33 vjeç, u arrestua pas disa orësh kërkimesh nga policia. Sherri nisi pas lojës së pokerit, kur autori u larguar nga lokali për t’u kthyer përsëri me një armë zjarri automatik dhe sapo u fut brenda, qëlloi me breshëri plumbash drejt tavolinës ku ndodheshin shokët me të cilët kishte debatuar. Sipas policisë, ai njihej si përdorues i substancave narkotike dhe si person me veprime emocionale të pakontrolluara. Për ngjarjen e sotme, kanë nisur hetimet për përcaktimin e lëndës narkotike, si dhe për të gjetur sesi dhe kush ia ka siguruar brenda në qeli.