Policia e Sarandës ka ekzekutuar ditën e sotme një vendim gjykate, duke arrestuar shtetasin Klementin Islamaj, 43 vjeç, banor i fshatit Shalës, në bashkinë Konispol. Arrestimi i tij u bë pasi Gjykata e Shkallës së Parë e Juridiksionit të Përgjithshëm Sarandë e ka dënuar me 3 vite e 4 muaj burg për veprën penale “vrasje e kryer në gjendje të tronditjes së fortë psikike”. Ngjarja për të cilën është dhënë dënimi daton më 10 gusht 2024, në familjen Islamaj në Shalës të Konispolit. Sipas të dhënave të kohës, 69-vjeçari Hysen Islamaj, babai i Klementinit, kishte vrarë bashkëshorten e tij, 66-vjeçaren Shano Islamaj, dhe më pas kishte kanosur e sulmuar edhe të birin. Në dëshminë e tij, Klementin Islamaj ka treguar momentet e rënda të ngjarjes, duke theksuar se ka qenë në gjendje të fortë tronditjeje psikike pasi pa nënën e pajetë dhe u përball me agresionin e të atit. Ai ka deklaruar se, i frikësuar edhe për fatin e fëmijëve, ka reaguar duke goditur babanë me grushta dhe shkelma, pa përdorur mjete të forta. Pas përplasjes, ai është përpjekur t’i japë ndihmë të atit dhe më pas ka kontrolluar nënën, të cilën e gjeti në momentet e fundit të jetës. Menjëherë pas kësaj, ai ka kërkuar ndihmë duke njoftuar ambulancën. Edhe pse kanë kaluar pothuajse dy vite nga kjo ngjarje e rëndë, mësohet se 43-vjeçari vijon të jetë në gjendje të rënduar psikologjike.