"Jemi të dëshpëruar se nuk kemi asnjë informacion," thotë e afërmja e një të burgosurit, pasi të paktën 44 njerëz u vranë në trazirat e burgut dhe rreth 100 të burgosur janë arratisur. Ndërkohë autoritetet transferonin me helikopterë të burgosurit më të rrezikshëm në institucione të tjera prej frikës së përplasjeve. Trazirat nisën pasditen e të hënës në burgun e qytetit ekuadorian, në episodin më të fundit të dhunës që po trondit vendin amerikano-jugor. Autoritetet thanë se perleshjet nisën pas transferimit nga gjykata të një anëtari bande në burgun e Santo Domingo, që mund të ketë shkaktuar panik mes të tjerëve. Autoritetet e vendit thanë se 43 vetë kishin vdekur, shumica e të cilëve të qëlluar me thika. qeveria thotë se trazirat në burgje lidhen me luftën mes bandave të trafikut për territor. Vitin e kaluar 316 të burgosur humbën jetën në trazirat në burgje të ndryshme të Ekuadorit. Ndërkoha gjendja në burgun e Bellavista është vënë nën kontroll, sipas komandantit Fausto Salinas. Në burgjet e mbipopulluara të vendit mbahen më shumë se 35,000 njerëz. Presidenti konservator Guillermo Lasso ka premtuar të reduktojë dhunën në burgje me anë të procesit të paqes mes bandave dhe reformave politike e sociale.