Një zyrtar iranian deklaroi se Teherani do t’i “vërë flakën kujtdo që përpiqet të kalojë” nëpër Ngushticën e Hormuzit. Paralajmërimi vjen nga Ebrahim Jabbari, një këshilltar i Komandantit të Përgjithshëm të Korpusit të Gardës Revolucionare Islamike të Iranit, duke folur në televizionin shtetëror. Jabbari tha gjithashtu se amerikanët janë “të etur për naftën e rajonit” dhe se Irani do të “godasë tubacionet e tyre në rajon dhe nuk do të lejojë që nafta të eksportohet nga kjo zonë”. Pak më vonë reagoi zëdhënësja e Shtëpisë së Bardhë, Karoline Leavitt, që thotë se “49 udhëheqësit më të lartë të regjimit iranian” janë vrarë në operacionin izraelito-amerikan ndaj Iranit. “49 nga udhëheqësit më të lartë të regjimit iranian – përfshirë liderin suprem Ayatollah Ali Khamenei – janë zhdukur nga faqja e Tokës deri më tani në sulmet hapëse të ‘Operacionit Epic Fury’”, shkroi ajo në rrjetet sociale. Ndërkohë Komanda Qndrore Amerikane konfirmoi se ka shkuar në 6 numri i ushtarëve të vrarë, ndërsa njoftoi se ka fundosur 11 anije iraniane në Gjirin e Omanit, duke lënë Iranin pa asnjë anije të mbetur në atë zonë. Sekretari i Shtetit, Marko Rubio tha se ditët e ardhshme do të jenë akoma më ndëshkuese për Iranin. Po ashtu reagoi edhe Sekretari i Mbrojtjes, Pete Hegseth, duke thënë se sulmet e SHBA-së ndaj Iranit nuk kanë për qëllim të sjellin "ndryshim regjimi", ndërsa ka shtuar se “kjo nuk do të jetë një luftë si në Irak, por pritet të zgjasë vetëm 4 javë”.