Irani kreu një sulm të ri në Arabinë Saudite. Këtë radhë bëhet fjalë për rafinerinë “Ras Tanura”, që i përket ‘Aramco’ një prej kompanive më të mëdha të naftës në botë. Nga sulmi iranian në këtë rafineri, nuk janë raportuar lëndime në njerëz duke qenë se ishin marrë masat për të mbyllur rafinerinë, por dëmet materiale ishin të shumta. Ras Tanura u mbyll si një masë paraprake sigurie dhe situata është nën kontroll. Një zëdhënës i Ministrisë Saudite të Mbrojtjes, dy dronë u interceptuan pranë rafinerisë, mbetjet e të cilëve shkaktuan një zjarr të limituar duke shtuar se nuk pati të lënduar, Ndërkaq, çmimet globale të naftës janë rritur teksa Irani vazhdon sulmet në Lindjen e Mesme, në përgjigje të ofensivës së vazhdueshme nga SHBA-ja dhe Izraeli. Nafta u rrit për 10 për qind, duke arritur në mbi 82 dollarë për fuçi të hënën, pasi të paktën tri anije u sulmuan pranë Ngushticës së Hormuzit gjatë fundjavës. Po ashtu edhe çmimet e gazit natyror u rritën deri në 25 për qind. Irani paralajmëroi anijet që të mos kalojnë nëpër këtë korridor strategjik detar në jug të vendit, përmes të cilit transportohet rreth 20 për qind e naftës dhe gazit. Sipas analistëve, transporti ndërkombëtar detar në hyrje të Ngushticës së Hormuzit pothuajse ka ndalur, duke shtuar shqetësimet për furnizimin global me energji. Ndërkohë, ari që konsiderohet aset i sigurt në kohë pasigurie u rrit me 2.3%, duke arritur në 5,395.99 dollarë për ons.