Top Channel/ Vrasje në Itali, Viktima dhe autori nga fshati Kallmet i Lezhës, familjet të tronditura

Një ngjarje e rëndë ndodhi pak ditë më parë në një provincë në Breshia të Italisë, ku u ekzekutua një shqiptar 33-vjeçar. Alfons Kola, 33-vjeçari është shqiptari i vrarë me thikë jashtë një lokali në Calcinato afër Breshias. Ai kishte mbërritur në spital në kushte të rënda dhe nuk mundi të mbijetonte, pavarësisht se i ishte nënshtruar një operacioni delikat. Një person është arrestuar për vrasjen. Bëhet fjalë për Petrit Gegën, 52 vjeç, bashkatdhetar i viktimës, që dyshohet se ishte sulmuesi i 33-vjeçarit dhe u ndalua nga karabinierët pasi ishte arratisur. Mësohet se si viktima Alfons Kola ashtu edhe autori Petrit Gega janë nga fshati Kallmet Vogël i Lezhës. Banesat e tyre në këtë fshat janë vetëm pak metra larg njëra-tjetrës. Sipas banorëve familjet kanë pasur marrëdhënie shumë të mira me njëra-tjetrën dhe janë të tronditur nga kjo ngjarje.