Momenti i vdekjes së Renee Nicole Good, gruas së vrarë në Minneapolis nga një patrullë e ICE (policia kundër emigracionit), është dokumentuar nga disa video, të xhiruara si nga agjentë federalë ashtu edhe nga dëshmitarë okularë. Pamjet, shumë të qarta dhe të rënda, janë filmuar nga disa kënde, dhe gjithmonë e më shumë duket se e kundërshtojnë variantin zyrtar të administratës Trump sipas të cilës, 37 vjecarja kishte tentuar ta shtypte efektivin me makinë. Videot tregojnë makinën me Renee Good në timon të ndaluar në mes të rrugës, teksa një kamioncinë gri pa shenja identifikuese, por me sirenë dhe drita blu, ndalon pranë saj. Nga mjeti zbresin tre agjentë të armatosur; njëri pozicionohet përpara makinës, një tjetër qëndron disa hapa pas, ndërsa i treti tenton të hapë me forcë derën e shoferes, duke i bërtitur të zbresë. Mes protestave të kalimtarëve, drejtuesja e automjetit përpiqet të largohet duke u tërhequr mbrapsht dhe më pas duke kthyer djathtas. Gjatë kësaj manovre, agjenti përpara makinës hap zjarr nga afër, duke qëlluar fillimisht xhamin e përparmë dhe më pas edhe dy herë të tjera brenda kabinës. SUV-i vazhdon lëvizjen për inerci dhe përplaset me disa makina të parkuara. Një video e publikuar më vonë, e regjistruar nga kamera trupore e agjentit te ICE, tregon momentin kur ai i afrohet automjetit dhe dëgjohet gruaja duke thënë se nuk është e zemëruar, teksa me sa duket gjithmonë e më shumë në pamje, ajo ka kthyer rrotat djathtas, e ka tentuar të largohet.. Pamjet nuk shfaqin drejtpërdrejt momentin e të shtënave, por regjistrojnë zhurmën e tyre dhe përplasjen fatale të automjetit. Pas publikimit të pamjeve, në disa qytete të Shteteve të Bashkuara kanë shpërthyer protesta dhe marshime në kujtim të Renee Good, me thirrje për drejtësi dhe llogaridhënie ndaj agjentëve të përfshirë. Demonstruesit kanë dënuar dhunën policore dhe politikat e ashpra të emigracionit, duke e cilësuar rastin si një tjetër simbol të abuzimit me pushtetin. E ndërkohë që hetimet vazhdojnë, ndërsa tensionet sociale mbeten të larta.