24 orë pas vrasjes së biznesmenit Mondi Mëhalla, policia e Elbasanit konfirmon ndalimin e personit të parë të dyshuar për ngjarjen. Naldo Gjoni banues në Lezhe është shoqëruar nga blutë e Elbasanit pasi verifikohet të ketë përdorur mjetin tip audi që u gjet i djegur në Mirakë mëngjesin e kësaj të hëne. Gjithashtu policia ushtroi kontroll në banesën e Gjonit në Lezhë në kërkim të provave materiale që mund të hedhin dritë mbi ngjarjen. Ndërkohë disa dhjetëra të shoqëruar gjatë 24 orëve në policinë e Elbasanit të cilër merren në pyetje në lidhje me krimin. Biznesmeni Mondi Mëhalla banues në Tiranë, por me disa aktivitete biznesi në Elbasan u ekzekutua me tre plumba pistoletë mbrëmjen e së dielës teksa dilte nga zyra e tij në Elbasan. Dy plumba e goditën 43 vjecarin në kokë duke i shkaktuar vdekjen e menjëhershme. Mëngjesin e të hënës policia gjeti të djegur në fshatin Mirakë të Librazhdit mjetin tip Audi me të cilin dyshohet se është kryer vrasja dhe brenda tij një pistoletë që mendohet të jetë arma e krimit. E kaluara e biznesmenit që njihen edhe me emrin Edmond Hyka, konkurrenca apo konflikte të tjera të mundshme janë pistat në të cilat po heton policia dhe prokuroria e Elbasanit.