25 vjecari Vehid Muric, i dyshuar për vrasjen e trefishtë në Podgoricë është vënë në pranga sipas policisë malazeze. Në mesin e viktimave ishin edhe dy vëllezër shqiptarë, Denis Hoti (28 vjec) dhe Nezrin Hoti (27 vjec), si dhe 56 vjecari Kenan Miraljemovic. Sipas njoftimit zyrtar, forcat e rendit pas një operacioni të gjerë dhe të mirëkoordinuar, e kanë lokalizuar Muricin në qendër të Rozhajës dhe e kanë arrestuar. Mediat vendase thonë se 25 vjecarin e ka denoncuar vetë e ëma. “Ai i ka thënë nënës se i ka njollosur duart me gjak dhe ka dalë nga shtëpia. Pak pas kësaj, ajo e ka raportuar në polici”, është shprehur Drejtori i Prokurorisë Themelore të Shtetit në Rozhajë të Malit të Zi, Aldin Kalac. Kalac nënvizoi ndërkohë se nuk janë të sakta pretendimet e disa mediave se Vehid Murici është raportuar për dhunë në familje. “Nëna nuk ka raportuar asnjë dhunë ndaj saj”, nënvizoi zyrtari. Sipas Vijestit, rasti i është dërguar Prokurorisë së Lartë në Podgoricë. POlicia shprehet se tashmë janë siguruar prova të mjaftueshme që tregojnë se Muric është autori i krimit. Dyshimet deri tani janë se krimi i trefishtë është paraprirë nga një mosmarrëveshje mes 25 vjecarit dhe viktimave.