Gjykata e Durrësit vendosi këtë të shtunë lirimin e katër shtetasve të arrestuar për moskallëzim të krimit në lidhje me vrasjen e dyfishtë në Manëz të Durrësit. Të arrestuarit, Erald Cani, 25 vjeç, Ergi Kadiu, 21 vjeç, Taulant Beqja, 37 vjeç, dhe Emirian Beqja, 34 vjeç, të gjithë banues në Manëz, u lanë të lirë nga gjykata e cila në një seancë me dyer të mbyllura caktoi për të gjithë masën detyrim paraqitjeje pranë policisë gjyqësore' si dhe ndalim të daljes jashtë shtetit, ndërsa hetimet për ngjarjen vijojnë. Krimi që tronditi opinionin publik ndodhi në orët e para të ditës së mërkurë, pas një sherri banal në një nga lokalet e zonës, ku humbën jetën Aranit Kurti dhe Flori Paluçi. Ndërkaq, autori i dyshuar i njërës prej vrasjeve, Daniel Pepa, 21 vjeç, mbetet ende person në kërkim. Ai dyshohet se qëlloi për vdekje Flori Paluçin, i cili vrau fillimisht Aranit Kurtin, shokun e Pepës. Ndaj 21-vjeçarit janë ngritur akuzat për “Vrasje me dashje” dhe “armëmbajtje pa leje”, ndërsa në kërkim është edhe Gëzim Allçi, 30 vjeç, i akuzuar se e ndihmoi Pepën të largohet nga vendi i ngjarjes. Policia po vijon punën për gjetjen dhe kapjen e dy personave në kërkim.