Vrasja e një qytetari amerikan nga agjentët federalë të emigracionit të shtunën ka shkaktuar protesta të reja dhe reagime të forta politike në Minneapolis. Alex Pretti, 37 vjeç, infermier i repartit të terapisë intensive, u qëllua për vdekje nga agjentët federalë gjatë një përplasjeje në një rrugë të mbuluar me akull. Ngjarja vjen më pak se tre javë pas një incidenti tjetër fatal, ku një oficer i Shërbimit të Emigracionit qëlloi për vdekje Renee Good, gjithashtu 37 vjeç. Administrata Trump reagoi menjëherë duke deklaruar se Pretti kishte synim të dëmtonte agjentët federalë, një version që, sipas mediave amerikane, vihet në dyshim nga pamjet filmike të publikuara. Departamenti i Sigurisë Kombëtare deklaroi se tek viktima ishte gjetur një pistoletë me municion. Sekretarja e Sigurisë Kombëtare, Kristi Noem, deklaroi se Pretti “ishte aty për të ushtruar dhunë”, ndërsa zëvendësshefi i stafit të Shtëpisë së Bardhë, Stephen Miller, e cilësoi atë si “vrasës”, një deklaratë e shpërndarë edhe nga zëvendëspresidenti JD Vance. Megjithatë, pamjet e filmuara me telefon, të transmetuara gjerësisht nga mediat amerikane, tregojnë Pretti duke filmuar agjentët dhe duke orientuar trafikun. Pas një momenti ku një agjent shtyn një protestuese, Pretti ndërhyn dhe spërkatet me një substancë kimike, përpara se të shtrihet përtokë dhe të neutralizohet nga disa oficerë. Sekonda më pas, agjentët hapin zjarr, duke qëlluar edhe trupin e tij të palëvizshëm. Guvernatori i Minesotës, Tim Walz, e quajti ngjarjen “të tmerrshme” dhe kërkoi që hetimi të udhëhiqet nga autoritetet shtetërore, duke deklaruar se qeveria federale “nuk mund të besohet” për një hetim të paanshëm. Presidenti Donald Trump, nga ana tjetër, akuzoi Walz-in dhe kryetarin e bashkisë së Minneapolisit, Jacob Frey, për “nxitje kryengritjeje”, ndërsa ka kërcënuar edhe me përdorimin e Aktit të Kryengritjes për të dërguar trupa federale në shtet. Protestat janë shtuar ditët e fundit në Minneapolis, ku mijëra agjentë federalë janë dislokuar në kuadër të fushatës së ashpër të deportimeve. Qindra qytetarë u mblodhën sërish në protesta, pavarësisht temperaturave ekstreme, duke kërkuar ndalimin e operacionit federal. Shefi i Policisë së Minneapolisit deklaroi se situata pas të shtënave ishte “jashtëzakonisht e paqëndrueshme”, ndërsa Garda Kombëtare e Minesotës është angazhuar për sigurimin e zonës.