Detaje të reja kanë dalë në dritë nga vrasja e 14 vjecares Vanja Gjorçevska në Shkup, dhe akoma më tronditëse e bën ngjarjen arrestimi i babait të vajzës që po merret në pyetje, ndërsa organizatori kryesor dhe autori i aktit, pasi ka qëlluar të miturën me pistoletë, është arratisur. Tre persona janë vendosur aktualisht nëpranga. Përpos 14 vjecares, i ekzekutuar u gjet edhe një 74 vjecar me inicialet P.ZH, nga qyteti i Veleshit. Gjorçevska ishte zhdukur në 27 nëntor, pasi kishte dalë nga shtëpia për të shkuar në shkollë. “Lidhur me të dyja rastet janë të dyshuar pesë persona dhe për tre prej tyre është caktuar masa e paraburgimit, njëri ndodhet në arrati jashtë shtetit”, deklaroi ministri i Punëve të Brendshme, Oliver Spasovski. Ai shtoi se policia do të bëjë gjithçka të mundur për të nxjerrë para drejtësisë autorin e krimit që tronditi mbarë rajonin. Bëhet fjalë për personin me inicialet L.P nga Shkupi, i njohur në opinion si drejtues i lëvizjes “E treta”, thotë REL. “Do të bëjmë gjithçka që ky individ të vihet para drejtësisë sapo të shkelë tokën tonë”, u shpreh Spasovski. Thuhet se arsyeja e vrasjes është përfitimi material nga e ëma e vajzës së vrarë dhe se në këtë rast, është i përfshirë babai i saj, i cili, ka informuar anëtarët tjerë për kohën kur ka dalë vajza nga shtëpia dhe lëvizjen e saj drejt shkollës. Sipas policisë, viktima tjetër nuk kishte lidhje me vajzën, por kishte pasur mosmarrëveshje me një anëtar tjetër të grupit të dyshuar kriminal.