Një ngjarje tronditëse është zbuluar një ditë më parë në Ambelokipi të Athinës, ku një 33-vjeçare shqiptare u vra nga bashkëshorti i saj me të cilin kishte kaluar më shumë se 13 vite bashkë, dhe në jetë kishin sjellë dy fëmijë. Ishte vetë autori i krimit, Kastriot Cenko i cili telefonoi ditën e djeshme policinë duke u thënë se ka vrarë Albën që prej së enjtes së javës së shkuar, dhe se trupin e ka fshehur në papafingon e banesës ku jetonin. Para efektivëve ai ka pretenduar se krimin e ka kryer pasi kishte dyshime se gruaja e tradhtonte me shokun e tij të ngushtë, dhe se e ka dëgjuar që të flasë në telefon. Më pas ai deklaroi se ajo i kishte pohuar se do të largohej me një person tjetër dhe se nuk donte të jetonte më me të. “E dëgjova të thoshte se do të merrte djalin tonë të madh dhe do të largohej ndërsa në linjë tjetër dëgjohej një zë mashkulli. I thashë të vinte në dhomë të flisnim. E pyeta se kush ishte dhe ajo më tha se nuk ishte askush dhe se po shikonte video. Pas pak ajo pranoi se po fliste me një burrë dhe se do të merrte djalin e madh dhe do të ikte. E pyeta se përse do të merrte djalin e madh dhe më tha se këtë fëmijë nuk e ka bërë me mua dhe vetëm djalin e vogël kemi bashkë”. 39-vjeçari thotë se pas këtij momenti e ka goditur një herë në kokë me një çekiç dhe më pas për t’u siguruara, e kishte mbytur me një karikues telefoni. Autori thotë se fillimisht trupin e fshehu në dhomë, dhe një ditë më pas kur fëmijët nuk ishin në banesë, e mbështolli me qese plastike dhe e futi në papafungo, duke e fshehur për 7 ditë. Veprimet e marra më pas, sërish i përkisnin një skenari të zi, ku ai u shkruante familjarëve të së ndjerës me numrin e saj të telefonit, duke u thënë se po largohet drejt Italisë, dhe që të mos e kërkonin, e aq më pak ta denonconin. Por duket se skenari, i menduar e përpunuar për 7 ditë, për të fshehur këtë krim monstruoz nuk doli sipas planit, duke u detyruar që të pranojë dhe të rrëfejë vrasjen. Ky ishte një tjetër lajm i trishtë ku në qendër nxjerr edhe një herë vrasjen brutale të grave nga ata që supozohej t’i donin e mbronin, nga bashkëshortët apo partnerët e tyre… Të shumtë janë rastet tragjike, por pas zbulimit të detajeve të vrasjes së Albës, ajo që të vjen në mendje është vrasja e 20-vjeçares Caroline nga bashkëshorti i saj, piloti grek Babis, ngjarje e ndodhur në Greqi në 2021. Të dyja ato u vranë nga burrat e tyre, njëra me vajzën pranë shtratit, e tjetra me dy djemtë pak metra larg, në dhomën ngjitur. Edhe një herë skenari i Babis, për fat të keq merret shembull… ndërsa më herët këtë tragjedi e pamë të ndodhte edhe në Kosovë, me vrasjen e Liridonës!