Disa persona ndodheshin të hënën në mëngjes në një McDonald’s në afërsi të Pensilvanisë perëndimore, kur në një moment një klient tjetër tërhoqi vëmendjen e tyre. “Po mos vallë ai është vrasësi nga Nju Jorku?”, u shpreh me shaka njëri nga klientët teksa fliste me mikun e tij. Por shakaja rezultoi të ishte e vërtetë. Ai njeri ishte vërtet i kërkuari, i dyshuari për vrasjen e drejtorit ekzekutiv të UnitedHealthcare, që tronditi vendin. Luigi Mangione, 26 vjeç, ishte ulur vetëm në një tavolinë me një laptop dhe një çantë shpine, sipas policisë që e arrestuan në McDonald’s. Ai kishte një maskë mjekësore, një kapelë kafe dhe një xhaketë të errët. Një imazh i shpërndarë në mediat sociale nga Policia e Shtetit të Pensilvanisë tregonte autorin e maskuar. Trashëgimtar i një familjeje të pasur nga Baltimori, i diplomuar në një universitet të nivelit të lartë, 26-vjeçari ishte në Pensilvani për disa ditë, sipas policisë, pas dyshimit se vrau drejtorin ekzekutiv të UnitedHealthcare, Brian Thompson, të mërkurën e kaluar jashtë një hoteli në Manhattan. Ai u kap pas kërkimeve intensive nga efektivët.