Policia greke ka zbardhur ekzekutimin e 30-vjecarit shqiptar Ermal Keramanaj te ndodhur në Athinë në datën 25 maj. Sipas njoftimit të policisë greke, në pranga janë vënë 6 persona: një egjiptian, dy grekë, dy afganas dhe një person nga Bangladeshi. Policia thotë se çdo gjë nisi rreth orës 06.00 të mëngjesit të datës 25 maj në një hotel në qendër të Athinës, ne momentin qe viktima Keramanaj dhe e dashura e tij iu drejtuan një hoteli. Në rrethana që ende nuk dihen, njëri prej autorëve, shtetasi afgan Ali Naxhafi nisi të konfliktohet me Ermal Keramanajn. Pasi u përleshen në hollin e hotelit, viktima dhe e dashura e tij u larguan duke iu drejtuar rrugës Ajos Kostandinos. Por gjatë përpjekjeve për t’u larguar, ai u kap nga 6 të akuzuarit e më pas u dhunua me sende të forta si dhe u godit me thikë në pjesë të ndryshme të trupit. Si pasojë e plagëve të marra ai ndërroi jetën në spital pasi nuk mundi të mbijetojë. Ekspertiza mjekoligjore konstatoi se shkak i vdekjes se Ermal Keramanaj ishin plagët e marra nga mjeti prerës. Sipas policisë, vrasësit së bashku me viktimën njiheshin në zonë si përdorues të drogës. Të arrestuarit do të dërgohen në gjykate për masë sigurie.