Republikanë dhe demokratë u bënë bashkë në Dhomën e Kongresit Amerikan për të miratuar një sërë ligjesh, në një votim historik që dërgon ndihmë direkte financiare drejt Ukrainës, Izraelit dhe Tajvanit. Akti i Ndarjeve Suplementare të Sigurisë në Ukrainë u votua nga 311 senatorë, ndërsa 112 ishin kundër, kryesisht Republikanë. Paketa përmban në total 91 miliardë dollarë, ku një pjesë e mirë shkon për ushtrinë amerikane dhe forcimin e prezencës së saj në rajonin përreth Rusisë, ndërsa 14 miliardë dollar do të jenë ndihmë direkt për Ukrainën në mënyrë që të blejë armë të reja dhe moderne që i nevojiten. Ndërkohë mbështetja ishte më e pakursyer për Izraelin, në të cilën 358 kongresmenë votuan pro ndihmës financiare ndaj shtetit hebre. Gati 40 miliardë dollarë do të shkojnë për armatime të reja dhe përsosjen e sistemit të mbrojtjes “Iron Dome”, ndërsa 9 miliardë dollarë si ndihmë humanitare. Mbështetje do të ketë edhe për Tajvanin, ndërsa akti përmban nene që ndalojnë influencën kineze në SHBA, një risk për mbylljen e aplikacionit Tik-Tok. Presidenti ukrainas Volodymyr Zelensky tha në një postim në X se ai është "mirënjohës" për ligjvënësit e Dhomës, duke falënderuar personalisht kryeparlamentarin republikan Mike Johnson "për vendimin që e mban historinë në rrugën e duhur". Kryeministri izraelit Benjamin Netanyahu gjithashtu në rrjete sociale falënderoi Dhomën e SHBA “që demonstron mbështetje të fortë dypartiake për Izraelin dhe mbron qytetërimin perëndimor”. Presidenti i SHAB-së, Joe Biden përshëndeti veprimin historik duke thënë se dërgon një "mesazh të qartë" për udhëheqjen e Amerikës në glob. Që nga tetori presidenti i SHBA-ve kërkonte më shumë fonde për Ukrainën, ndërsa Republikanët e kthyen mbështetjen në axhendë politike duke bllokuar dhe shtyrë votimin. Tashmë ligji i miratuar i kalon Senatit të kontrolluar nga demokratët e Biden dhe më pas merr firmën e presidentit për të hyrë në fuqi. Pamjet: AFP