Pasditen e së martës në qendrat komunale të numërimit në Prishtinë, Lipjan, Obiliq dhe Partesh ka nisur numërimi i votave të kandidatëve për deputetë dhe verifikimi i votave për subjektet politike. Për herë të parë votat e qytetarëve në nivel komunal grumbullohen në një hapësirë. E Në sallën "1 Tetori" ku është Qendra Komunale e Numërimit për Prishtinën do të numërohen mbi 118 mijë vota të qytetarëve të kryeqytetit. Të vendosur në 10 tavolina, zyrtarët fillimisht do të verifikojnë formularin me votat e subjekteve politike për secilin vendvotim e pastaj do fillojnë numërimin e votave të kandidatëve për deputetë. I gjithë ky proces për herë të parë do të vëzhgohet nga kamerat. Nga Komisioni Qendror i Zgjedhjeve nuk kanë specifikuar një datë se kur do të përfundojë numërimi në Prishtinë dhe as kur të fillojë numërimi në QKN-të e tjera.