Ministrja e Jashtme e Suedisë, Maria Malmer Stenergard, u sulmua me domate e qepë të kuqe gjatë debatit në Kuvend mbi votën e Suedisë për referendumin e OKB-së për luftën në Izrael. “Politico” ka raportuar të enjten se aktivistë pro-palestinezë nisën të bërtisnin dhe të hidhnin perime në drejtim të ministres kur ajo përfundoi fjalimin mbi situatën në Lindje të Mesme. Ministrja u ngrit nga karrigia dhe u nis të dilte nga salla, derisa tre persona janë arrestuar për këtë incident. “Duhet të jeni në gjendje të merrni pjesë në diskutimin e një debati pa hedhur gjëra. Sidomos në sallën e Riksdag, që është dhoma e përfaqësuesve”, ka deklaruar më pas shefja e diplomacisë suedeze. Kryeministri Ulf Kristerson ka kërkuar masa më të rrepta sigurie pas incidentit dhe kërkoi hetim se si janë futur perimet aty. Ndërkaq, sa i përket shpërthimeve dhe të shtënave me armë që ndodhën në afërsi të ambasadave të Izraelit në Stokholm dhe Kopenhagen më herët këtë javë, Shërbimi sekret i Suedisë, njoftoi se Irani mund të ketë qenë i përfshirë në këto akte. Autoritetet vendëse sqaruan se zgjedhja e shënjestrave dhe metodat çojnë tek Irani, por tha se “janë më tepër supozime sesa njohuri”. Të hënën në mbrëmje u qëllua me armë në drejtim të Ambasadës së Izraelit në Stokholm, por nuk pati të lënduar. Më pas dy shpërthime u raportuan në afërsi të Ambasadës së Izraelit në Qendër të Kopenhagenit në mëngjesin e së mërkurës, por pa dëme në njerëz.