Drejtuesit e Bashkimit Evropian u takuan të mërkurën me udhëheqësit e vendeve të Ballkanit Perëndimor për të diskutuar mbi zgjerimin dhe mbi Planin e Rritjes ekonomike. Në konferencën e përbashkët, presidentja e Komisionit Europian, Ursula Von der Leyen deklaroi se do jepet më shumë mbështetje financiare për vendet e këtij rajoni. Në këtë iniciativë të BE-së për vendet e Ballkanit Perëndimor, Shqipëria dhe Mali i Zi do të bashkohen vitin që vjen. “Kemi reforma shumë ambicioze për të zbatuar nga partnerët tanë në Ballkanin Perëndimor. Këto reforma do të mbështeten me fonde. Kemi 300 milionë euro për të mbështetur reformat. Hapi i parë do të jetë integrimi i tyre në tregun e përbashkët europian. Do të japim më shumë akses me kosto më të ulëta të kapitalit financiar. Shqipëria dhe Mali i Zi do të bashkohen në këto iniciativa vitin që vjen, ndërsa dhe vendet e tjera më pas”. Nga ana tjetër, Presidenti i Këshillit Europian, Antonio Kosta, tha se “zgjerimi me vendet e Ballkanit Perëndimor është investimi më i madh gjeopolotik që Europa mund të bëjë në drejtim të sigurisë, paqes dhe prosperitet. Kritike me unionin ka qenë presidentja e Kosovën Vjosa Osmani. Ajo ka deklaruar se takime të tilla janë një rast i mirë për të çuar përpara perspektiven evropiane të të gjithë rajonit, por sipas Osmanit, në procesin e zgjerimit BE po i bëhet padrejtësi Kosovës. “Duket se ka tendenca në BE nga disa shtete anëtare që Kosova vazhdimisht të dënohet”, tha Osmani. Presidentja e Komisionit Evropian, Ursula von der Leyen ka thënë se Komisioni Evropian është i gatshëm për të përgatitur opinionin për status kandidati për Kosovën si dhe të heq masat, por se për këtë duhet unanimitet në Këshill.