“Qeveria Kurti shkel rregullat”, deklaroi raportuesja për Kosovën në Parlamentin Europian. Në një fshikullimë të rrallë nga ana e saj, zyrtarja që ka pasur përgjithësisht qëndrime të qarta pro Kosovës deri më tani, u ankua se Prishtinës zyrtare “ i mungon vullneti politik për avancim në procesin e integrimit në BE”. Von Crammon u shpreh në një intervistë për mediat bullgare, të pëcjellë pas edhe nga mediat në Kosovë, se kabineti Kurti nuk ka bërë hapat e nevojshëm për anëtarësimin bllok. “Qeverisë së Kosovës i mungon vullneti politik për të përparuar në integrimin europian të vendit. Kabineti ka aplikuar për anëtarësim në Këshillin e Evropës dhe në BE, por hapat e nevojshëm për përparim në këto aplikacione nuk janë bërë”, u shpreh zyrtarja e njohur. Von Crammon e nënvizoi se Qeveria e Kosovës aktualisht nuk po ua lehtëson aspak jetën qytetarëve, por po u dërgon atyre sinjale shumë “të përziera”. “Partnerët ndërkombëtarë janë të lodhur nga mosveprimi i Prishtinës, dhe kjo çoi në marrjen e masave ndëshkuese nga BE-ja vitin e kaluar”, ishte komenti i saj. Për t’u anëtarësuar në BE, Kosova, vazhdoi më tej raportuesja, duhet të njihet si një vend i pavarur nga shtetet anëtare, pesë prej të cilave nuk e njohin ende. “Të gjithë pajtohen tek ideja se ka nevojë për një përfundim të suksesshëm të dialogut për normalizimin e marrëdhënieve Beograd-Prishtinë”, theksoi ajo.