Me kërkesë të Prokurorisë, gjykata e Tiranës ka firmosur arrestimin e drejtorit të IT-së në Policinë e Shtetit, Ervin Muça. Ai akuzohet për kopjimin pa autorizim të të dhënave të sisitemit TIMS, një ngjarje mbi të cilën pak ditë më parë u ngrit edhe një komision hetimor parlamentar. Po ashtu Muça është pezulluar edhe nga detyra. Referuar hetimeve, Ervin Muça rezulton të ketë hyrë në orët e vona të natës të 2 gushtit 2023 në bazën e të dhënave të Policisë së Shtetit që ndodhet në Drejtorinë e Teknologjisë dhe Informacionit tek rruga 'Mine Peza'. Ai ka përdorur pin-in personal të një punonjësi tjetër jo prezent, duke ngritur dyshime të arsyeshme për veprime jo korrekte dhe në kundërshtim me ligjin. Nga hetimi ndërmjet të tjerash, rezultonte se Ervin Muça ishte këshilltar i jashtëm i Drejtores së Agjencisë Shtetërore të Kadastrës, ndërkohë që mbante funksionin e Drejtorit të Departamentit për Teknologjinë dhe Informacionin në Policinë e shtetit. Ligji për policinë e shtetit, ndalon veprimtari të dyta përveç mësimdhënies. Por Ervin Muça nuk e ka deklaruar këtë veprimtari të dytë në dokumentet aplikuese për pozicionin e Drejtorit të Departamentit për Teknologjinë dhe Informacionin në policinë e shtetit.