Në këshillin Bashkiak të Vlorës ka dështuar tentativa e tretë që dy firma private të përfitonin tokë shtetërore nëpërmjet bashkisë. Diskutimi i projektvendimit për nisjen e procedurave nga ana e bashkisë së Vlorës, e cila do të merrte fillimisht pronësinë është kthyer në një mollë sherri, mes këshilltarëve demokratë dhe atyre socialistë, por në fund nuk është votuar as nga këta të fundit. Demokratët kundërshtuan duke akuzuar bashkinë se nuk kishte as dokumentacionin e duhur për transferimin. Ata hodhën hije dyshimi edhe për procedurën e cila kërkohet të realizohet brenda një kohë të shkurtër por që sipas tyre kjo sipërfaqe nuk mund t'i jepet ndërtuesit pasi ka pronarë në proces gjyqësor. Sipas kreut të grupit të Partisë Demokratike në Këshillin Bashkiak, Atird Hoxha, kjo ishte hera e tretë që projeketvendimi tentohej të kalohej në këshill bashkiak. Demokrati sqaroi se kundërshtimi i tyre lidhej me dy parcela toke të cilat ndodhen në zonat me elitare të qytetit siç është në Lungomare, dhe pranë portit të Vlorës, me interes të madh zhvillimi. Cmimet e apartamenteve në këto zona variojnë nga 2500 në 3000 euro m/2, ndërkohë që dyqanet shkojnë deri 10 mijë euro m/2.