Rikthehen problemet me furnizimin me ujë të pijshëm në Vlorë. Qyteti ka mbetur pa ujë pas një defekti të regjistruar në një prej tubacioneve kryesore të rrjetit të ujësjellësit. Ujësjellës Kanalizime Rajoni Vlorë njoftoi se shkak i ndërprerjes është një avari e rëndë në tubacionin 500 mm, pranë zonës së “Miramare”, çka ka sjellë stakimin e të gjitha stacioneve të furnizimit me ujë në qytet. Grupet teknike u angazhuan menjëherë në terren dhe do vijojnë punën gjatë natës për riparimin e defektit dhe rikthimin sa më të shpejtë të furnizimit normal me ujë. Aktualisht po pritet rënia e presionit të ujit, në mënyrë që specialistët të ndërhyjnë për riparimin e plotë të defektit. Mësohet se do të vendoset një fashetë speciale, e cila do të izolojë plotësisht çarjen në tubacion. Për momentin furnizimi me ujë është ndërprerë në të gjithë qytetin, ndërsa autoritetet nuk kanë dhënë ende një afat të saktë për rikthimin e shërbimit. Kjo nuk është hera e parë që Vlora përballet me probleme të tilla. Në dhjetor të vitit të kaluar, qyteti mbeti për disa ditë pa ujë, pasi një nga tubacionet qendrore pësoi dëmtime të rënda, duke detyruar ndërhyrjen me pajisje të specializuara të ardhura nga jashtë vendit.