Muzeu i famshëm i Luvrit në Paris ra dje pre e një grabitje spektakolare, ku katër persona vodhën disa xhevahire të çmuara të periudhës Napoleoniane brenda vetëm pak minutash. Muzeu u mbyll menjëherë pas ngjarjes ndërsa policia franceze ka nisur një hetim të gjerë për identifikimin e autorëve. Hajdutët, të veshur me jelekë të verdhë pune, hynë në Luvër, muzeu më i vizituar në botë që ishte tashmë i hapur dhe plot me vizitorë, dje (e diel) në mëngjes rreth orës 9:30. Një operacion që zgjati maksimumi 7 minuta (sipas burimeve të tjera vetëm 4), i pabesueshëm për shpejtësinë, lehtësinë dhe efektivitetin me të cilat u krye në zemër të Parisit, vetëm pak metra nga Prefektura e Policisë. Katër grabitës përdorën ashensorin e ngarkesave të një kamioni që e kishin parkuar kundër drejtimit të trafikut buzë lumit Sena, për të arritur në ballkonin e katit të parë. Ata hynë në muze dhe dolën pak minuta më vonë duke marrë me vete nëntë stoli, pastaj u larguan me dy skuterë Yamaha TMax. I vetmi gabim që grabitësit bënë gjatë arratisjes, ishte të humbnin kurorën e perandoreshës Eugénie, bashkëshortja e Napoleonit III, e cila u gjet e dëmtuar pranë muzeut. Një pjesë e jashtëzakonshme e përbërë nga 1,354 diamante, 1,136 trëndafila dhe 56 smeralde të vendosura në ar të gdhendur në formë shqiponje — një nga dy kurorat e vetme, e ruajtura të një sovrani francez, së bashku me atë të Luigjit XV. Stolitë e vjedhura kanë një vlerë teorikisht të paçmueshme, sepse është e pamundur të shiten. Por nëse do të copëtoheshin dhe gurët e çmuar të arit do të shiteshin veçmas, do të vlenin miliona euro. Përveç dëmit ekonomik, domethënia simbolike e grabitjes është e madhe. Hajdutët — që detyruan muzeun të mbyllej si të dielën ashtu edhe sot, të hënën më 20 tetor — kanë shkelur sallën 705 të Luvrit, pra Galerinë e Apolonit, e cila strehon koleksionin mbretëror të stolive dhe diamanteve të kurorës, në katin e parë. Siç shpjegon vetë muzeu, “është në Galerinë e Apolonit që Luigji XIV për herë të parë e lidh fuqinë e tij mbretërore me hyjninë e diellit. Për të realizuar këtë kryevepër dekorative që bashkon pikturën, skulpturën dhe arin, Luigji XIV u rrethua me artistët më të mëdhenj, të cilët disa vite më vonë punuan në Galerinë e Pasqyrave në Pallatin e Versajës.” Grabitja në një nga vendet më të njohura të Francës në botë — në të njëjtin nivel me Kullën Eiffel —ndodh në një moment të vështirë për vendin, i goditur nga kriza e financave publike dhe kaosi politik. Ministri i Brendshëm i emëruar vetëm tetë ditë më parë, për vite prefekt i Parisit, shkoi menjëherë në vendin e ngjarjes së bashku me ministren e Kulturës, duke pranuar “dobësinë e madhe të muzeve franceze”. Në shtatorin e kaluar, copëza ari me vlerë 600 mijë euro u vodhën nga Muzeu i Historisë Natyrore të Parisit, ndërsa Muzeu i Porcelanit në Limoges pësoi një grabitje me dëme të vlerësuara në 6.5 milionë euro.