Me kërkesë të prokurorisë, gjykata la në burg me afat dymujor njërin nga të arrestuarit për grabitjen e një argjendarie në Kamëz, i cili u paraqit i armatosur dhe me skafandër në kokë, duke rrëmbyer bizhuteri të shtrenjta. Përballë dy avokatëve, të cilët deklaruan se prangosja ishte e paligjshme, prokurori kërkoi masën me afat 60-ditor derisa të dalin akt-ekspertizat për Elez Hysa. Ende nuk ka të dhëna se kush është bashkëpunëtori i tij. Prokurori deklaroi se i riu dyshohet se vodhi bizhuteri të shtrenjta me vlerë 1 milion lekë, por ai kundërshton me alibinë se atë ditë kishte udhëtuar nga Krujë në Kroi i Madh për të bërë punë fshati. Prokuroria referon si prova, gjatë kontrollit në banesën e tij në fshat, gjetjen e një shisheje me benzinë, që pretendohet se u përdor për asgjësimin e provave, si edhe një kambale, doreza motori dhe një shkop gome. Mes provave, prokuroria renditi edhe shenjat e një vatre zjarri, ku u tha se i dyshuari kishte djegur provat. Por, i pyetur nga policia se çfarë kishte djegur, ai u përgjigj se për të ishin të rëndësishme punët e fshatit. Alfred Gjoni: “Ai s’ka qenë fare në Kamëz dhe kjo është prova më e madhe.” Pas masës me afat, mbrojtja njoftoi se do ta apelojë menjëherë çështjen, ndërkohë që grupi hetimor pohoi për Top Channel se është në rrugë të mbarë për të zbuluar edhe grabitësin tjetër.