I penduari i drejtësisë, Nuredin Dumani deklaroi në seancën gjyqësore të së enjtes se ka grabitur rreth 500 mijë euro në shtëpinë e dhëndrit të Agron Dukës. I kontaktuar nga Top Channel, Kryetari i Partisë Agrare Ambientaliste, e quajti të pavërtetë deklaratën e Nuredin Dumanit. Duka sqaroi se dhëndri i tij jeton prej vitesh në Angli me vajzën e tij dhe dy fëmijët e tyre dhe se nuk ka ndodhur asnjë grabitje në banesën e tyre. “Nuk është e vërtetë që i është grabitur banesa. Nuk e di si ka lindur kjo ide. 500 mijë euro unë s’kam pse i mbaj në shtëpi, unë jam biznesmen, paratë i mbaj në bankë”, tha Duka, duke hedhur poshtë pretendimet e Dumanit. I penduari i drejtësisë, Nuredin Dumani, deklaroi në procesin me dyer të hapura në Gjykatën e Posaçme të Krimeve të Rënda se ishte përfshirë në grabitjen e shtëpisë së dhëndrit të Agron Dukës në Shijak dhe në Vilbashtovë. Dumani sqaroi se grabitja ishte realizuar me një makinë tip ML, për të cilën kishte hequr targat dhe disa pjesë për të shmangur identifikimin. Ai gjithashtu tha se në shtëpi kishte mbi 500 mijë euro.