Autoritetet kompetente në Gjermani dhanë fundin alarmin për dy rastet e dyshuara me virusin e rrezikshëm Marburg, pas rezultateve negative të analizave laboratorike. Të mërkurën, policia mbylli dy linja në stacionin kryesor të Hamburgut ndërsa ekipet e urgjencës me pajisje të plota mbrojtëse evakuuan një tren nga Frankfurti pasi mjekët u kontaktuan nga dy pasagjerë, një student 26-vjeçar i mjekësisë dhe partnerja e tij, për shqetësimet rreth infeksionit. Departamenti i çështjeve sociale të Hamburgut njoftoi se ” individi, i cili punonte në një spital në Ruandë si pjesë e studimeve të tij mjekësore, doli negativ për virusin Marburg pas një testi PCR”. Studenti i mjekësisë do të vijojë të monitorohet deri në 21 ditë, thuhet në njoftim. Qendra Evropiane për Parandalimin dhe Kontrollin e Sëmundjeve (ECDC) lëshoi një deklaratë mbi shpërthimin e virusit Marburg në Afrikë, duke thënë: Më 27 shtator 2024 , Ministria e Shëndetësisë e Ruandës raportoi rastin e parë të Sëmundjes së Virusit Marburg në vend. Që nga 2 tetori 2024, në qark janë raportuar gjithsej 36 raste, përfshirë 11 vdekje. Qeveria e Ruandës po zbaton hetime epidemiologjike, duke përfshirë gjurmimin e kontakteve, forcimin e protokolleve të parandalimit dhe kontrollit të infeksionit dhe masa të tjera për të kontrolluar shpërthimin. Ndër kontaktet e hetuara në Ruandë, një që kishte udhëtuar në Belgjikë ka përfunduar periudhën e ndjekjes (21 ditë) dhe nuk konsiderohet si rrezik për shëndetin publik. Javën e kaluar, Drejtori Rajonal i Organizatës Botërore të Shëndetësisë për Afrikën, tha: Ne po aktivizojmë me shpejtësi të gjitha aspektet kritike të reagimit ndaj shpërthimit për të mbështetur Ruandën e për të ndaluar shpejt dhe në mënyrë efektive përhapjen e këtij virusi. Me sistemin tashmë të fuqishëm të reagimit ndaj shëndetit publik të vendit, OBSH po punon ngushtë me autoritetet kombëtare për të ofruar mbështetjen e nevojshme për të forcuar më tej përpjekjet e vazhdueshme.