Janë shpallur fituesit e Konkursit Ndërkombëtar “Hospitality Albania”, një nismë që synon transformimin e vilave qeveritare në Shkodër dhe Vlorë në destinacione ekskluzive të turizmit elitar. Fituesit e këtij konkursi janë studio arkitekturore prestigjioze ndërkombëtare: “Saunders Architecture” për rezidencën në Shkodër dhe “Practica Arquitectura y Urbanismo SLP” për projektin në Vlorë. Projekti i studios norvegjeze “Saunders Architecture” sjell një vizion të veçantë: ruajtjen e vilës ekzistuese, e cila do të transformohet në një hotel me rreth 30 dhoma. “Ndërtesa nuk duhet të jetë si një kala, por të ftojë njerëzit të hyjnë dhe ta përjetojnë. Qasja jonë është që hoteli të ofrojë luks përmes përvojës, jo vetëm pamjes,” – u shpreh përfaqësuesi i studios. Në Vlorë, ish-rezidenca e Enver Hoxhës do të shndërrohet në një qendër turistike me ndërtesa 8-10 katëshe, të lidhura përmes një pishine monumentale. “Synojmë një arkitekturë që ofron privatësi, thjeshtësi dhe ndjesinë e rigjenerimit. Përveç hotelit, kemi propozuar ndërtimin e ‘shtëpive në pemë’, si pjesë e një qendre të kujdesit për shëndetin dhe mirëqenien,” deklaroi përfaqësuesi i studios “Practica Arquitectura y Urbanismo”. Kryeministri Edi Rama më herët e cilësoi projektin si një model të ri zhvillimi, ku shteti bëhet partner i drejtpërdrejtë në sipërmarrje, bazuar në praktikat më të mira të Italisë dhe Spanjës.