Për Izraelin pauzën humanitare e shkeli Hamasi. Sipas ushtrisë izraelite militantët e Hamas qëlluan me raketë në drejtim të territorit izraelit çka i detyroi të rinisnin luftimet për të vënë në zbatim premtimin e tyre të ditës së parë të luftës: Shkatërrimin e Hamasit. Gjatë pauzës njëjavore të luftimeve, Hamasi liroi 80 pengje izraelite në këmbim të 240 të burgosurve palestinezë. Ndërkohë që me rinisjen e luftës, ushtria izraelite njoftoi se kishte asgjësuar 200 objektiva të Hamas sipas tyre, nga ana tjetër Ministria e shëndetësisë e drejtuar nga Hamasi në Rripin e Gazës tha se më shumë se 100 njerëz ishin vrarë në territorin palestinez të premten pas rifillimit të luftimeve. Sekretari i Përgjithshëm i Kombeve të Bashkuara, Antonio Guterres tha se ndjente keqardhje të thellë për rifillimin e armiqësive midis Izraelit dhe Hamasit. Shtëpia e Bardhë nga ana e saj tha se do të vazhdonte të bënte presion për një pauzë më të zgjatur humanitare. Ndërkohë që gjatë së enjtes kryediplomati amerikan Antony Blinken, teksa takoi zyrtarë izraelitë dhe palestinezë, bëri thirrje për zgjatjen e armëpushimit dhe paralajmëroi se lufta duhet të mbrojë civilët palestinezë. Pamjet: AFP