Moti i keq i ditëve të fundit shënoi një viktimë në juglindje të vendit. Pas më tepër se 24 orësh kërkime, është gjetur e pajetë në fshati Progër 75 vjeçarja Flora Hoxha. Trupi i pajetë i të moshuarës, e cila vuante nga demenca u gjet rreth 1 km në anën perendimore të përroit të fshatit. Gruaja e cila jetonte me bashkëshortin dyshohet se u mbyt aksidentalisht pasi e mori rrjedha e ujit që kishte vërshuar në fshat. Ndërsa situata në Progër ka shkuar drejt normalizimit pasi uji ësjtë tërhequr ashtu si në pjesën më të madhe të qarkut, bilanci i dëmeve është i madh. Në gjithë qarkun janë 15 ura fshatrash të dëmtuara si pasojë e së cilave disa fshatra janë të izoluar e po ashtu inertet në rrugë kanë sjellë vështirësi qarkullimi në disa akse. 50 banesa në bashkinë e Pogradecit janë dëmtuar si pasojë e vërshimit të ujit ndërkohë në Maliq mbi 300 ha tokë janë nën ujë. Shkak i përmbytjeve u bë rritja e prurjeve dhe çarja e argjinaturave në lumenjtë Devoll dhe Dunavec për riparimin e të cilave autoritetet po punojnë. Tërheqja e ujit dhe rënia e nivelit ka ulur kërcënimin për përmbytje të tjera ndërsa mbi 700 familje në qark përballen me mungesë të energjisë elektrike.