Të paktën tre civilë u vranë dhe njëmbëdhjetë të tjerë u plagosën, duke përfshirë një fëmijë, në një sulm me dronë rusë në qytetin port të Izmailit, në Danub në Ukrainën jugperëndimore, pranë kufirit me Rumaninë. Imazhet e postuara në internet nga guvernatori i Odeses tregojnë një ndërtesë banimi të shkatërruar pjesërisht dhe në flakë. Forcat Ajrore të Ukrainës lëshuan sirena për të paralajmëruar sulme raketore dhe me dronë edhe në rajonet Herson, Mikolaiv dhe Sumi. Sakaq mbrojtja ajrore ruse tha se rrëzoi shtatë dronë ukrainas gjatë natës në rajonin jugor rus të Rostovit. Presidenti rus, Vladimir Putin, e quan luftën operacion special ushtarak, për të çmilitarizuar Ukrainën. Si pasojë e këtij konflikti të nisur që në shkurt të vitit 2022 kanë humbur jetën mijëra persona dhe miliona të tjerë janë zhvendosur nga shtëpitë e tyre. Perëndimi është përgjigjur me sanksione ndaj Rusisë, duke goditur ekonominë e këtij shteti, por edhe me ndihma miliarda dollarëshe.