Izraeli njoftoi se sulmoi "dhjetëra objektiva ushtarake" në Iranin jugperëndimor, teksa konflikti mes dy vendeve hyri në ditën e nëntë. Media iraniane raportoi se një qendër emergjence në provincën Khuzestan ishte në shënjestër të sulmeve izraelite, ndërkohë që pati njoftime për shkatërrimin plotësisht të një universiteti. Organi për mbikëqyrjen bërthamore i OKB-së thotë se Izraeli goditi një central atomik iranian në Isfahan, ndërsa mediat perëndimorë shtuan se nga ky sulm u dëmtuan edhe disa ndërtesa. Autoritetet izraelite njoftuan të shtunën në mbrëmje se që nga e premtja e 13 qershorit, Irani qëlloi afërsisht 480 raketa dhe 1,110 dronë sulmues drejt civilëve izraelitë. Më shumë se 50 vende të goditura, duke përfshirë ndërtesa banimi. 25 të vrarë, midis tyre fëmijë. 2,572 persona janë plagosur, prej të cilëve 14 në gjendje të rëndë. Sipas Agjencisë së Lajmeve për Aktivistët e të Drejtave të Njeriut me seli në SHBA, sulmet ajrore izraelite kanë vrarë 639 persona në Iran, përfshirë oficerë të lartë ushtarakë dhe shkencëtarë bërthamorë. Më herët, ushtria izraelite tha se vrau në një sulm komandantin iranian Saeed Izadi. Kreu i divizionit të Forcës Palestineze Quds, pjese e Korpusit të Gardës Revolucionare Islamike, u sulmua në apartamentin ku ai ndodhej në qytetin iranian të Komit. Pohimi erdhi nga ministri izraelit i Mbrojtjes, Israel Katz, i cili shpjegoi se Izadi ishte ai që "financoi dhe armatosi Hamasin para masakrës së 7 tetorit. Teksa sulmet mes dy vendeve vijojnë, në rrjet, u përhap me shpejtësi apeli i Reza Pahlavit, djali i Shahut të fundit të Iranit, Mohammad Reza Pahlavi, i cili u rrëzua gjatë Revolucionit Islamik të vitit 1979. Përmes një video të shpërndarë në rrjetet sociale, i biri i Shahut bën thirrje për rrëzimin e regjimit aktual në Iran, duke theksuar “nevojën për mosbindje civile pa dhunë dhe një referendum mbi rendin e ardhshëm të vendit”.