Shtëpia e kardinalit shqiptar Ernest Simoni Troshani është grabitur në qendër të Firences. Ngjarja ndodhi kur ai ishte në Londër për një takim me Mbretin Charles. Sipas të përditshmes “corriere della sera” hajdutët hynë në apartamentin pranë “Piazza Duomo” duke çarë murin pranë derës së blinduar me dy dalta. Më pas bastisën banesën dhe morën sende me vlerë rreth 30 mijë euro. Ngjarja u zbulua vetëm në mbrëmje, sepse kardinali 97-vjeçar dhe nipi i tij Tonini, së bashku me bashkëshorten, nuk ndodheshin në shtëpi. Ata ishin larguar rreth orës 13:00 dhe u kthyen rreth orës 23:00, kur gjetën derën të dëmtuar dhe apartamentin tërësisht të përmbysur. “Jemi të tronditur. Ndiheshim të sigurt. Është e pabesueshme që kjo ndodhi pikërisht këtu, në Piazza Duomo, ndoshta edhe në mes të ditës”, ka thënë nipi i kardinalit. Sipas të dhënave paraprake nga banesa janë marrë para cash, sende ari, bizhuteri, medalje dhe një vulë ari. Mes sendeve të vjedhura ishte edhe leja e qëndrimit e kardinalit Simoni. Nipi i tij dyshon se autorët e kishin vëzhguar më herët familjen dhe e dinin se banesa do të ishte bosh. “Sigurisht që nuk vepruan rastësisht. Na kishin vëzhguar. E dinin që nuk ishim në shtëpi”, ka shtuar ai. Tonini tregon se kur telefonoi kardinalin në Londër, shqetësimi i parë i tij nuk ishte për sendet me vlerë, por për statujat fetare që mbahen në dhomën e tij. “Ai pyeti: A e lanë statujën e Zonjës së Medjugorjes? Po statujën e Padre Pios? Kur i thashë se ishin ende aty, tha: ‘Epo, atëherë nuk qenka aq keq.’” Hetuesit po shqyrtojnë edhe pamjet e kamerave të sigurisë në Piazza Duomo, një prej zonave më të monitoruara të Firences, ndërsa dy dalta të përdorura për të dëmtuar murin u gjetën të braktisura në shkallët e pallatit. Familja e kaloi natën duke sistemuar banesën, ndërsa dera nuk mund të mbyllej. Kardinali Ernest Simoni Troshani, është i mbijetuar i regjimit komunist në Shqipëri dhe i emëruar kardinal nga Papa Françesku në vitin 2016.