Një video ku shihet sesi aktorët ndiqen nga ujqër të vërtetë gjatë një transmetimi live në Kinë, ka bërë të jepet alarmi për sigurinë e personave pjesëmarrës në reality show dhe ate të audiencës. Pamjet e filmuara në një teatër të qytetit Xi`an u postuan në rrjetin social kinez Weibo dhe brenda pak ditësh u bënë virale, duke marrë më shumë se 433 milionë klikime. Ato tregojnë sesi një numër ujqish lëshohen nga prapa skenës, duke u hedhur mbi vendt e publikut e duke ndjekur aktorët. Kjo konsiderohej pjesë e spektaklit të titulluar "The Legend of Camel Bell" thotë CNN. Nuk ka asnjë masë mbrojtëse kunder kafshëve të rrezikshme. “ Unë u tmerrova vetëm duke parë videon”, shkruan një përdorues i Weibos. “ A janë në vete këta? Po sikur të ndodhte dicka e papritur”, thotë një tjetër. Një përfaqësues i kompanisë që ka në pronësi të saj teatrin ku u organizua shfaqja e cmendur, pretendon se “ujqit në fjalë janë të sigurtë dhe nuk i lëndojnë njerëzit”. Sipas tij ata janë stërvitur nga trajnues profesionistë, ndërsa shtoi se aktorët mbanin veshje mbrojtëse për të mos u lënduar. Megjithatë, shfaqja e rrezikshme është dënuar me forcë dhe ka shkaktuar shqetësim të madh mes përdoruesve të internetit që panë videon.