Top Channel ka mundur të sigurojë videon e atentatit ku mbeti i vrarë biznesmeni Mondi Mëhalla në Elbasan, video e cila rrëzon hamendësimet e deritanishme për mënyrën e ekzekutimit. Në video shihet qartë atentatori i mbuluar me kapuç i cili del nga makina, qëllon tre herë dhe merr mjetin largohet. Vrasësi vepron i vetëm edhe si qitës edhe si drejtues mjeti. Më herët gjatë ditës së sotme u bënë publike edhe pamjet kur autori del nga parkimi me automjetin për të shkuar drejt vendit ku edhe so të ndodhte krimi Ishte pikërisht ky automjet në pronësi të kompanisë së viktimës dhe ortakut të tij Xhino Ago që zbardhi disa detaje të ngjarjes edhe pse video e ekzekutimit ngre pikëpyetje të tjera mbi përfshirjen e personave të arrestuar deri tani. Mëngjesin e kësaj të mërkure policia arrestoi 29 vjecarin Nevzat Spaho nga Prrenjasi, gjithashtu i dyshuar si bashkëpunëtor në vrasjen e 43 vjecarit Mëhalla. Të paqarta janë rrethanat që lidhin Spahon, një person me precedentë të theksuar penalë me biznesmenin. Të martën policia arrestoi ortakun e viktimës Xhino Ago, banues në Elbasan, i dyshuar si bashkëpunëtor. Po ashtu u arrestua roja i karburantit Kujtim Pisha, 52-vjeç, për “Moskallëzim i krimit”. Në kërkim u shpall Marselo Arani 32 vjeç, banues në Elbasan dhe Armando Kola 35 vjeç, banues në Laç, të dyshuar si të përfshirë në vrasje gjithashtu. Në kuadër të operacionit tashmë të koduar “Strike” grupi i hetimor I përbërë nga specialistët e krimeve në drejtorinë e policisë së qarkut Elbasan, specialistë të drejtorisë së përgjithshme të policisë dhe prokurorisë pritet të specifikojnë rolin e secilit në këtë ngjarje.