Magda Suljoti, në profesion është inxhiniere ndërtimi dhe eksperte zjarrfikëse. Certifikatat e siguruara nga Drejtoria e Përgjithshme e Zjarrfikësve deri në mars të vitit 2024, për 9 vite rresht, i jepnin asaj të drejtën të kryente edhe detyrën si trajnuesе bazë në fushën e mbrojtjes nga zjarri. Në bazë të ligjit nr. 152, “Për shërbimin e mbrojtjes nga zjarri dhe shpëtimin”, subjektet detyrohen të marrin masa parandaluese ndaj zjarrit, të cilat fillojnë me kontrollin e sistemeve dhe vazhdojnë me trajnimin periodik të personelit. Janë ekspertët ata që i mësojnë stafit se si të veprojë në rast zjarri. Por, në nëntor të vitit 2024, ministri i Brendshëm i asaj kohe, Ervin Hoxha, me anë të udhëzimit nr. 64, ndryshon kriteret për dhënien e certifikatave për ushtrimin e aktivitetit privat në fushën e mbrojtjes ndaj zjarrit.