Top Channel/ Vendosen sanksione kundër Rusisë/ Rusët përgjigjen: S’ndryshojmë politikën me kërcënime

SHBA ka vendosur sanksione të reja gjatë orëve të fundit ndaj Rusisë ku përfshihen kryesisht anëtarët e familjeve të rrethit të ngushtë të Presidentit rus Vladimir Putin. Denis Bortnikov dhe Vladimir Kiriyenko, dy persona të cilëve u janë vendosur sanksione individuale nga Departamenti i Thesarit të martën, mbajnë pozicione të larta në biznesin rus. Të dyve do tu bllokohen pasuritë në SHBA. Ndërkohë sanksione u vendosën edhe për dy banka ndër më të rëndësishmet në Rusi. Bashkimi Europian vendosi gjithashtu sanksione ndaj deputetëve të dumës ruse të cilët i dhanë aprovimin presidentit rus që të dërgojë ushtrinë jashtë kufijve të Rusisë, çka tregon qëllimet e putin për të sulmuar Ukrainën. Australia njoftoi se do të shënjestrojë dhe ajo dy banka ruse e do të ndalojë udhëtimin për tetë anëtarë të Këshillit të Sigurimit të Putinit. Kryeministri japonez, Fumio Kishida, njoftoi gjithashtu se qeveria e tij do të ndalojë shpërndarjen e re të letrave me vlerë të qeverisë ruse në Japoni, si dhe do të ndalojë udhëtimin e njerëzve të lidhur me dy rajonet separatiste ukrainase dhe do të ngrijë asetet e tyre. Por për ambasadorin e Rusisë në SHBA këto sanksione nuk do të zmbrapsin Rusinë.