Shtetet e Bashkuara nuk do të ndërmjetësojnë më në negociatat e paqes midis Ukrainës dhe Rusisë, pas refuzimit të Presidentit rus Vladimir Putin për të nënshkruar një armëpushim. Sipas gazetës Telegraph, Departamenti Amerikan i Shtetit u bëri thirrje Kievit dhe Moskës që të paraqesin propozime “konkrete” dhe të takohen drejtpërdrejt për të zgjidhur konfliktin. Departamenti i Shtetit ka njoftuar dy vendet se SHBA po ndryshon qasjen ndaj bisedimeve, duke mos marrë më pjesë në takime pa paralajmërim dhe pa rezultat konkret. Ndërkohë, Donald Trump, sipas raportimeve, ka miratuar raundin e parë të dërgesave të armëve drejt Ukrainës nga administrata e tij. Në planin ekonomik dhe strategjik, Ukraina dhe SHBA kanë nënshkruar një marrëveshje për zhvillimin e burimeve natyrore ku përfshihen mineralet e rralla dhe krijimi i një fondi investimi për disa dekada. Autoritetet ukrainase deklaruan se ky fond do të ndihmojë në rimëkëmbjen ekonomike dhe rindërtimin e vendit. Investimet amerikane do të mund të përfshijnë edhe mbështetje ushtarake, si sistemet e mbrojtjes ajrore. Ndërsa sipas burimeve të inteligjencës të cituara nga CNN, Presidenti rus Vladimir Putin duket se ka zhvendosur vëmendjen nga qëllimet afatgjata në Ukrainë në konsolidimin e kontrollit mbi territoret e pushtuara dhe në ringjalljen e ekonomisë së dobësuar ruse.