Detaje të reja kanë dalë në dritë nga vendimi i Apelit të GJKKO për kryetarin e Partisë Demokratike, Sali Berishën. Top Channel ka zbuluar se SPAK ka kërkuar të pyeten 137 dëshmitarë dhe 5 të pandehurit e procedimit duke u konsideruar si prova të gjalla. Ndërsa vendimi që ktheu Berishën në ‘detyrim paraqitje’ flet edhe për kërcënimin e dëshmitarëve që mund të vijë nga ndikimi i të dyshuarit. Konkretisht, Apeli i Posaçëm duke iu referuar shkallës së parë që hoqi arrestin shtëpiak thotë se “Përveç mungesës së rrezikut të ikjes, ka arsyetuar edhe mungesën e rrezikut të dëmtimit të provave për shkak se çështja tashmë ka kaluar në seancë paraprake dhe ky rrezik është shuar duke qenë se provat janë marrë”. Në vendim thuhet se, duke analizuar personalitetin e të pandehurit dhe sjelljen e tij, veprën penale që i atribuohet dhe llojet e provave të kërkuara e të marra nga organi i akuzës si dhe shtrirjen e hetimeve në kohë, nuk konstatohet të ekzistojë një rrezik i tillë”. Në përfundim të analizës që lidhet me rrezikun e helmimit të provave, si një prej kushteve të veçanta për caktimin e masës së sigurimit ndaj kërkuesit, gjykata e apelit sërish thekson se argumentet e dhëna nga gjyqtari i hetimit dhe të konfirmuara në të gjitha shkallët e pushtetit gjyqësor, nuk mund të rivlerësohen pa konstatuar prezencën e elementëve të rinj provues.