Këshilli i Ministrave e cilëson antikushtetues vendimin e Gjykatës së Posaçme Antikorrupsion për të pezulluar nga detyra zëvendëskryeministren Belinda Balluku, njëherësh ministre e Infrastrukturës dhe Energjisë, si dhe për t’i ndaluar daljen jashtë vendit. Në vendimin e firmosur nga Rama, që Top Channel e disponon, qeveria i kërkon Gjykatës Kushtetuese të pezullojë vendimin e GJKKO ndaj Ballukut, duke argumentuar se cenon kompetencat e tre institucioneve kushtetuese: Kryeministrit, Presidentit dhe Kuvendit. “Ky vendim cenon garancinë e imunitetit të anëtarit të Këshillit të Ministrave, i cili, sipas pikës 3, të nenit 103, të Kushtetutës ‘gëzon imunitetin e deputetit’; Cenon parimin e ndarjes së pushteteve, të parashikuar në nenin 7, të Kushtetutës, duke vendosur pezullimin nga detyra të ministrit, si organ kushtetues i një pushteti tjetër dhe pengon veprimtarinë e Këshillit të Ministrave; Ndërhyn në kompetencat e organeve kushtetuese, që kryejnë propozimin, emërimin dhe miratimin e ministrit në detyrë”.