Fati i shtetasit gjerman 85-vjeçar që dyshohet se u nis më 9 shtator nga brigjet veriore të Barit të Italisë drejt Kroacisë nuk dihet ende. Ai është i mbuluar nga misteri, ndërsa veliera që dyshohet se drejtohej prej tij ka dalë këtu në breg të detit në Karpen të Kavajës. Ajo është marrë në ruajtje 24 orë nga policia e shtetit e cila ka kontaktuar familjarët e 85-vjeçarit bazuar në numrat e gjetur në telefonat celular që u gjetën brenda bordit të velierës. Ata kanë kontaktuar fillimisht me motrën e 85-vjeçarit dhe më pas me vajzën e tij e cila ka konfirmuar se do të niset drejt Shqipërisë për të ndjekur fatin e babait të saj. Që nga e marta, veliera "Free Choice" është shfaqur në afërsi të brigjeve të Karpenit me motorr të fikur, teksa lëvizte e shtyrë nga dallgët. Sokol Agushi ka qenë i pari që e ka parë dhe menjëherë ka kontaktuar policinë lokale për lëvizjet e pakontrolluara të mjetit lundrues me flamur gjerman dhe port regjistrimi Hamburgun. Pista kryesore e hetimeve të deritanishme është ajo e rënies aksidentale në det të hapur në përpjekje për të riparuar velën kryesore të mjetit lundrues që është dëmtuar nga era e fortë. Sipas të dhënave paraprake, 85-vjeçari e kishte me leje armën që u gjet në bord. Ndërkohë në bord është gjetur dhe një mace e cila dyshohet se ashtu si arma e shoqëronte 85-vjeccarin nga Leipzig Frank Rudiger Fellman në lundrimet e tij.