Erion Veliajt ju dha liria e përkohshme. Por i prangosur e i vetëm përballë shtetit. Me daljen nga burgu për një ditë për të shkuar drejt Gjykatës kushtetuese foli për dy padrejtësitë që mendon se i janë bërë si kryetar i bashkisë së Tiranës: shkarkimi dhe arrestimi. Beteja ime për t’u dëgjuar prej jush vjen pas një sage të gjatë zhgënjyese, për të dëgjuar se çfarë kam bërë, që jam rrëmbyer nga zyra, ku më kanë zgjedhur qytetarët dhe jam mbyllur në një qeli me regjim burgosjeje më të rëndë se vrasësit serial”. Pikëpyetjet e raporteve brenda socialistëve u shuan. Veliaj është i zhgënjyer me familjen politike, por me besimin në fe i justifikon. “Kur beson se ke dhënë gjithcka për këtë mandat të qytetarëve, vjen arsyeja për të cilën të largojnë nga detyra: “mosprezenca në detyrë për më shumë se tre muaj”. Nuk kishin si të më fyenin më rëndë. Ishte më e rënda e jetës sime publike, sepse erdhi nga bashkëpunëtorët e mi, nga njerëz që më njohin më mirë se kushdo dhe që nuk dënjuan as të më dëgjonin. Zoti i faltë! Lutem çdo natë për ta se nuk dinë ça kanë bërë!” Në një seancë që e quan historike, i zgjedhuri tre herë në krye të Tiranës shpresat e vetme i mban te drejtësia për të mbrojtur jo karrigen sipas tij, por demokracinë. I kërkon Gjykatës Kushtetuese të ndalojë zgjedhjet në kryeqytet për të sunduar ligji dhe jo vullneti politik. “Kjo është cështja gjyqësore që përcakton nëse pushteti do t’u përkasë ende qytetarëve apo do t’u merret atyre në mënyrë të fshehtë dhe hileqare, pas perdeve e lojërave të neneve e gërma të ligjit. Sepse të thuash se Erion Veliaj ka munguar në detyrë nuk është thjesht cinizëm me Veliajn, por me të vërtetën dhe ligjin. Kjo nuk është thjesht përpjekje për të më denigruar mua por është përcmim ndaj votës, ndaj forcës që kanë qytetarët”. Në 9 minutat e të vërtetës së tij para gjyqtarëve, shprehu ndjesinë e fajita veçse për mungesën në familje prej kohës dedikuar punëve të bashkisë. “Nëse është dikush që mund të ankohet për mungesën time është vetëm nëna e familja ime. djalin e kam takuar më shumë në burg se në liri, se gjatë punës sime i lija dhe i gjeja në gjumë. Punë që më shkëputën padrejtësisht dhe pabesisht ata që donin të më shihnin me pranga në duar dhe jo me lopatë në duar”. Erion Veliaj tregon se si do të jetë Shqipëria në sytë e tij në rast se Kushtetuesja njeh shkarkimin nga drejtimi i kreyqytetit dhe lejon zgjedhjet për kryebashkiakun e ri. “Nëse kjo pranohet, atëherë cdo mandat i zgjedhur nuk është më një garanci e sovranitetit qytetar por një leje që mund të të hiqet në cdo kohë nga vullneti politik. Nëse pranohet një gjë e tillë atëherë prezumimi i pafajësisë humbet kuptimin, atëherë nga nesër cdo qytet, dhe cdo mandate popullor mund të bjerë pre e vendimeve politike të momentit”. Në mbyllje të rrëfimit të 9 muajve në gjykim larg detyrës, Erion Veliaj nuk dëshiron të marr mëshirë apo privilegj në sallë, por kërkon të vendos drejtësi kushtetuese.