Kryetari i Bashkisë së Tiranës, Erion Veliaj, vizitoi xhaminë e re “Mahmut Vrapi”, në Njësinë 2, pranë ‘Qytetit Studenti’. Ai uroi besimtarët myslimanë të zonës për hapësirën e re dhe shprehu mirënjohjen për ata që kontribuan në ndërtimin e saj. Veliaj kujtoi se zona e Depos së Ujit, ku ndodhet xhamia e re, ka ndryshuar dhe populluar shumë. “Në vitet ‘80, Depoja e Ujit konsiderohej kufiri më i largët i botës që njihnim, kurse sot është një vend plot jetë, plot me fëmijë. Po vjen një brez i ri, i cili s’duhet të harrojë se brezi më i vjetër e ka nisur nga zero me shumë sakrifica, morën një vendim të guximshëm duke ardhur këtu nga çdo cep i Shqipërisë. Është sakrificë të ndërtosh një shtëpi, të ndërtosh një rrugë, të sjellësh një rrjet uji, por lala Mahmut, ne të jemi shumë mirënjohës që në ato vite të vështira ti kuptove ndoshta para të gjithëve se aq sa e rëndësishme është infrastruktura civile, shtëpia, rruga, shkolla, kopshti, çerdhja, aq e rëndësishme është edhe infrastruktura shpirtërore. Të jemi sot shumë mirënjohës dhe shumë falënderues që ti e ke mbajtur këtë frymë në ato kohë të vështira, dhe besoj se sa të jetë jeta, kjo xhami do të mbajë emrin tend, dhe do jetë një kujtesë për të gjithë brezat që nuk është kamja e madhe që na bën njerëz të mirë, po shpirti i madh”, tha Veliaj.