Kryebashkiaku i Tiranës, Erjon Veliaj ka bërë një tjetër reagim të gjatë nga burgu, ku thotë se po qëndron “pa asnjë akuzë formale dhe falë një prokurori lunatik e një gjykatësi politik”. Kësaj here ai tregon një nga arsyet pse po qëndron në burg duke iu referuar faqes 277 të dosjes së tij për sjelljen që ka pasur me hetuesit e BKH-së. Veliaj përmend emrin e hetuesit Samet Gurguri, i cili, një ditë të shtune, pasi bashkëshortja e tij Ajola kishte dëshmuar për më shumë se 9 orë në SPAK, i ka dërguar një mesazh për t’u paraqitur sërish në organin e akuzës. Veliaj thotë se vetë ai po udhëtonte drejt Uashingtonit. “Besoj bëra atë që do të bënte çdo burrë, i rashë telefonit të numrit anonim për të kuptuar se cili nëpunës shteti komunikon me Whatsap të shtunën në sabah me një grua, nënë, në prag të Vitit të Ri? Numri nuk u përgjigj. Teksa avioni bëhej gati për nisje, duke qenë se u bë e përsëritur, që sapo largohesha nga jashtë vendit, Olsi i sulej familjes sime, i shkruaj me sms këtij Sametit “është ditë e shtunë – sabat, shabat – edhe Perëndia pushoi të shtunën” dhe i kujtoj se është “turp kjo përndjekje e përsëritur e sime shoqeje sapo unë largohem nga vendi, e i them thuaji Ols Dados boll e molestove gruan time”, shkruan Veliaj. Ka mjaftuar ky tekst, thotë Veliaj për të shtuar akuzat ndaj tij dhe për të përligjur burgosjen e tij. Kryebashkiaku thotë më tej se hetuesi I BKH-së është aktivist i Partisë Demokratike. “Ah, i bëra edhe një kërkim në Google këtij Sametit e më doli një specialist në Spital të Fierit, aktivist i Partisë Demokratike, dega Libofshë, dhe komentues i rregullt kundër partizanëve, antifashistëve dhe komunistëve gjakatarë”, shkruan ai.