GJKKO ka lënë në “arrest me burg” kryebashkiakun Erion Veliaj. Gjyqtari Erjon Bani mori vendimin të mërkurën pas një seance të gjatë që nisi në orën 13:30 dhe përfundoi në orën 19:20. Gjyqtari Bani ndryshoi masën për bashkëshorten e Veliajt duke vendosur “detyrim paraqitje” për Ajola Xoxën. Ndaj saj është vendosur edhe ‘Ndalimi i daljes jashtë shtetit’ duke i sekuestruar pasaportën, ndërsa i është caktuar e premtja e parë dhe e katërt për t’u paraqitur para oficerit të policisë gjyqësore. Top Channel mëson se në seancë avokatët e Veliajt ofruan garanci pasurore, duke kërkuar që masa “arrest me burg” ndaj tij të kthehej në një masë më të butë, por kjo nuk u mor parasysh. Pas seancës Veliaj u dërgua në paraburgimin e Durrësit. Në seancën e mbyllur, Veliaj ka akuzuar prokurorin Ols Dado për konflikt interesi, duke e akuzuar për lidhje të drejtpërdrejta me lejet e ndërtimit dhe sipas tij prokurori e ka personale me kryebashkiakun e Tiranës. Veliaj e ka akuzuar prokurorin Dado edhe se ka përndjekur bashkëshorten, Xoxa, ndërsa ka thënë se vila në Qerret që përmendet në dosje, nuk i përket atyre, por vjehrrës së tij. Gjatë seancës mbështetësit e Veliajt kanë qenë të pranishëm për të shprehur solidaritetin me kryebashkiakun. Sipas SPAK, Veliaj është akuzuar për krijimin e një skeme korruptive mes kompanive të bashkëshortes dhe disa biznesmenëve të afërt me të. Në vendimin e shpallur GJKKO nuk ka ndryshuar masa e sigurisë për biznesmenin Elman Abule, i cili do të qëndrojë në burg. Ndërsa 5 biznesmenët e tjerë Fatmir Bektashi, Shkëlqim Fusha, Gentian Sula, Sokol Kryeziu dhe Meriman Palushi nuk ka ndryshuar masa e sigurisë ‘detyrim paraqitje’.