Erion Veliaj thotë se ka ende shpresë tek drejtësia, kur na ndajnë edhe dy ditë nga 15 shtatori, dita kur treshja e gjykatësve të lartë do të mblidhen me detyrimin ligjor për të rigjykuar e masën e sigurisë "arrest me burg". Treshja e gjyqtarëve e kryesuar nga Sandër Simoni duhet të zbatojë urdhrin e Gjykatës Kushtetuese. Kushtetuesja konstatoi se Gjykata e Lartë nuk kishte bërë një kontroll të individualizuar mbi proporcionalitetin e mbajtjes në burg të një kryebashkiaku të zgjedhur, duke shkelur të drejtat e tij. Të martën duhet të argumentojnë nëse Veliaj duhet të qëndrojë patjetër në qeli apo nëse mund të lirohet me një masë më të lehtë, si arrest shtëpie ose garanci pasurore për të ushtruar mandatin e tij si kryebashkiak. Pikërisht më 15 shtator Gjykata e Lartë është e detyruar ligjërisht të gjykojë rastin e tij sipas vendimit unifikues të 4 majit i cili e ka ndryshuar praktikën e zbatimit të masës së sigurisë "arrest në burg", duke e konsideruar atë si masë përjashtimore që mund të përdoret vetëm si alternativa e fundit.