Rreth 5 orë zgjati takimi i ekipit ndërkombëtar të mbrojtjes së kryebashkiakut të Tiranës, Erion Veliaj, në ambientet e burgut tē Durrësit. Dy avokatë britanikë, të shoqëruar nga avokati Plarent Ndreca, zhvilluan për herë të parë një takim me klientin e tyre. Në fokus të takimit ishte përgatitja e aplikimit që mbrojtja do të depozitojë në Gjykatën e Strasburgut, duke kundërshtuar vijimin e masës së paraburgimit. "Sot patëm një takim shumë produktiv. Kemi diskutuar rreth ankesës që synojmë të bëjmë në Gjykatën e Strasburgut, në Gjykatën Evropiane të të Drejtave të Njeriut, në emër të tij, për t'u ankuar për paraburgimin e tij, vazhdimin e paraburgimit të tij. Shpresojmë që vendimet nga gjykatat vendase në Shqipëri të përshpejtohen e të përparojnë sa më shpejt të jetë e mundur, për të siguruar që ai të lirohet dhe të vazhdojë jetën e tij familjare, si dhe të ushtrojë funksionin e tij si kryetar i zgjedhur demokratikisht i Bashkisë së Tiranës." Mbrojtja e Veliajt u shpreh se pret që procedurat në gjykatat shqiptare të ecin me ritme më të shpejta, ndërsa paralelisht po përgatitet edhe dosja për Strasburgun. Sipas avokatit Plarent Ndreca, avokatët britanikë arritën të takojnë Veliajn pas tetë muajsh kërkesa drejtuar SPAK-ut, ndërsa ekipi amerikan i përfshirë në mbrojtje nuk ka marrë ende autorizim për një takim me klientin. Ai tha se ankimi në Strasburg do të mbështetet në shkeljet që, sipas mbrojtjes, nuk janë adresuar nga vendimet e deritanishme të gjykatave shqiptare mbi masën e sigurisë.